Il-Knisja li temmen li ż-żwieġ huwa imfassal fuq l-imħabba ta' Kristu lejn il-Knisja, tqis li din l-għotja għandha tliet karatteristiċi ewlenin: il-fedelta', l-indissolubilta u l-unita'. Bħalma Kristu ħabb il-Knisja sal-aħħar nifs, hekk ż-żwieġ nisrani ma jistax jinħall. Il-Koppja fiż-żwieġ għandhom jagħtu l-prijorita' lil xulxin filwaqt li jaqsmu l-esperjenzi tal-ħajja tagħhom flimkien u jqisu lil xulxin bħala indaqs. Iż-żwieġ huwa wieħed mis-seba' sagramenti tal-Knisja. Bħas-sagramenti l-oħra insibu sinjal li nistgħu naraw ta' xi ħaġa li ma nistgħux naraw. L-Għarus u l-Għarusa huma s-sinjal viżibbli tal-imħabba ta' Alla lejn il-Bniedem u ta' Kristu lejn il-Knisja. Bħalma Kristu (l-għarus), ta ħajtu għalina li nemmnu u nagħmlu parti mill-Knisja (l-għarusa), hekk l-għarus u l-għarusa jagħtu kelma lil xulxin li jagħtu ħajjithom u dak kollu li huma għal xulxin sal-mewt. Din l-għotja lill-xulxin, il-miżżewġin jridu jgħixuha ta' kuljum. Waqt li jaħdmu biex jikbru fl-imħabba lejn xulxin ta' kuljum, ħajjithom issir xhieda ta' kif Alla jħobb lill-bniedem.

Bħalma din l-imħabba ta' bejn Kristu u l-Knisja tħalli l-frott, hekk il-miżżewġin ġodda jwiegħdu li jkunu lesti jilqgħu ħajja ġdida, jieħdu ħsiebha sew u jtuha edukazzjoni nisranija. B' dan il-mod, il-familja nisranija tkun "Knisja Domestika", post fejn wieħed jista jesperjenza l-preżenza u l-imħabba ta' Alla, filwaqt li jikber fil-fidi u l-kapaċita li jgħix mal-oħrajn. Huwa għalhekk li l-Knisja tqis iż-żwieġ bħala sagrament mill-aktar importanti. Iż-Żwieġ Nisrani

Żwiġijiet fil-Parroċċa tagħna:

Agius Charles ma’ Gauci Sharon

Galea Mark ma’ Spiteri Rebecca

"Bl-għajnuna tal-grazzja tal-Ispirtu Qaddis, il-miżżewġin jikbru fil-qdusija permezz taż-żwieġ tagħhom, anke billi jaqsmu flimkien il-misteru tas-Salib ta' Kristu li tbiddel id-diffikultajiet u t-tbatijiet f' offerta ta' mħabba. Mumenti ta' ferħ, rilassament, ċelebrazzjoni u anke s-sesswalita tista tkun mgħixha bħala sehem fil-ħajja ġdida tal-qawmien. Koppji miżżewġin, b' azzjonijiet mill-ħajja ta' kuljum jiffurmaw spazju imdawwal minn Alla li jgħin lil dak li jkun jesperjenza l-preżenza moħbija tal-Mulej irxuxtat...

It-talb fil-familja huwa mod speċjali kif inqawwu il-fidi. Wieħed għandu jsib ftit minuti kuljum fejn il-familja tinġabar quddiem Alla, taqsam miegħu l-inkwiet, titlob għall-bżonnijiet tagħha bħala familja, titlob għal xi ħadd li għaddej minn xi diffikulta, tirringrazzja lil Alla għall-ħajja u l-barkiet tagħha waqt li titlob lil Marija tipproteġieha taħt il-mant tagħha." Amoris Laetitia Eżortazzjoni Appostolika - 19 ta' Marzu 2016