Il-paġna elettronika ġiet iddisinjata sabiex tinforma u toffri diversita’ ta’ interess għal persuni f’kull stat tal-ħajja għax fi triqatna lkoll neħtieġu għajnuniet spiritwali. Għalhekk merħba tassew u nittama li ssib mezz kif dak li jidher fiha jgħinek tiżviluppa t-twemmin tiegħek u tagħti glorja lil Alla, l-Għajn ta’ kull ġid.
Nixtieq ukoll li l-paġna elettronika tal-Parroċċa ma tkunx biss għal dan li semmejt, iżda li tmur lilhinn u sservi sabiex min jidħol fiha jagħti kontribut permezz ta’ suġġerimenti siewja li jagħmlu l-inizjattivi pastorali aktar miftuħa b’firxa akbar ta’ kontributuri u ideat ġodda. Dan huwa mitlub minn kull nisrani attiv għat-tixrid tal-Bxara t-Tajba u l-glorja t’Alla.
Nitlob lil Mulej ibierek lilek u jseddaq ix-xewqat tajba tiegħek.
Imqanqlin mill-esperjenza tal-Għid, aħna u nkomplu dan iż-żmien liturġiku, fl-ewwel tlett ġimgħat, il-Knisja tħeġġiġna nirriflettu fuq misteri ewlenin tal-fidi tagħna. Fl-ewwel Ħadd wara Pentekoste, nirriflettu fuq it-Trinita Qaddisa, il-Missier, l-Iben u l-Ispirtu Qaddis. Bħala nsara imsejħin nidħlu f' dan il-misteru li ġie muri lilna minn Ġesu, waqt li nirringrazzjaw lil Alla l-Missier bil-ħeġġa u l-qawwa li jtina l-Ispirtu.
Il-Ħadd ta' wara, nerġgħu lura fiċ-ċenaklu fl-aħħar ikla ta' Ġesu', biex f' intimita miegħu, ninsew d-dieqa tat-tradiment tad-dixxipli u nirriflettu fuq ir-rigal tal-Preżenza reali ta' Kristu fl-Ewkaristija. Il-Ġimgħa ta' wara, ibbażata fuq devozzjoni popolari nisranija, nidħlu fil-fond tal-Qalb Ħanina ta' Ġesu', qalb li msejħin nimitawha.
Żmien il-Għid jintemm bil-festa ta' Pentekoste, it-tifkira ta' meta l-Ispirtu s-Santu niżel fuq t-tnax, li mogħnija bid-doni ta' Alla ħarġu jipprietkaw. L-istess Spirtu ta' Alla jmexxi lilna llum, il-Knisja tiegħu, biex nxandru l-Kelma tiegħu u nwassluH lid-dinja ta' madwarna. Għalkemm liturġikament l-Għid jispiċċa b' Pentekoste, aħna nibqgħu niċċelebraw b' mod speċjali l-Qawmien tal-Mulej Ġesu kull nhar ta' Ħadd filwaqt li f' kull jum ta' ħajjitna bħala nsara nipprovaw ngħixu dan il-Misteru.
Minbarra ċ-ċelebrazzjoni Ewkaristika li saret fl-ewwel tas-sena, b' kollaborazzjoni mal-Għaqda Mużikali Immakulata Kunċizzjoni, sar kunċert li jfakkar dan l-avveniment, nhar is-Sibt 21 ta' Jannar, fis-7:15pm, fil-Knisja Parrokkjali.